Baseli ‘shkatërron’ gjithçka para vetes

Mesfushori i Kombëtares shqiptare, Taulant Xhaka, e nisi këtë takim si titullar, por u zëvendësua nga trajneri i Baselit në minutën e 64-t

Keystone

Kampioni i Zvicrës, FC Basel po vazhdon të dominojë në Superligën zvicerane, duke dëshmuar se nuk ka konkurrencë as këtë sezon, shkruan albinfo.ch.

Baseli ka arritur të fitojë me rezultatin e thellë 6:0 në Superligën e Zvicrës përballë Vaduzit. Takimi i luajtur në shtëpinë e kampionëve në fuqi nuk ka pasur shumë histori, teksa në minutën e 10 dhe të 19 vendasit vendosën kontrollin me shifrat 2:0. Katër golat e tjerë u shënuan në pjesën e dytë të takimit.

Mesfushori i Kombëtares shqiptare, Taulant Xhaka, e nisi këtë takim si titullar, por u zëvendësua nga trajneri i Baselit në minutën e 64-t. Nga ana tjetër, Albion Avdiaj e ndoqi gjithë takimin nga stoli, teksa trajneri i Vaduzit nuk preferoi ta aktivizonte.

Pas kësaj fitoreje, Baseli vazhdon kryesimin e kampionatit me 41 pikë në 15 ndeshje, ndërsa Vaduzi renditet i fundit me vetëm 12 pikë.