BE-ja për hapjen e Urës së Ibrit: Kjo çështje të zgjidhet në dialog

unsplash

Pas deklaratës së zëdhënësit të Policisë së Kosovës për  rajonin e veriut, Veton Elshanit se Ura e Ibrit do të hapet së shpejti, Bashkimi Evropian ka bërë thirrje që kjo çështje të zgjidhet në dialog në Bruksel.

“Hapja e urës së Mitrovicës është temë e dy marrëveshjeve të arritura mes palëve në vitin 2015 dhe 2016 nën dialogun e lehtësuar nga BE-ja. Pavarësisht përpjekjeve të BE-së për lehtësimin ndër vite, ura mbetet e mbyllur për trafik. Pasi kjo është çështje që i përket dialogut të lehtësuar nga BE-ja, negociatat dhe çdo vendim që lidhet me urën duhet të bëhen në kuadër të dialogut me pjesëmarrjen e delegacioneve zyrtare të Kosovës dhe Serbisë”, është thënë në një përgjigje për media në Kosovë nga zyra e BE-së për Kosovën, transmeton albinfo.ch.

Tutje, Bashkimi Evropian u ka bërë thirrje palëve që të zbatojnë të gjitha marrëveshjet e dialogut dhe atë pa vonesa, përfshirë edhe marrëveshjen që ka të bëjë me urën.

“BE-ja mbetet e gatshme për t’i lehtësuar bisedimet. BE-ja u bën gjithashtu palëve të përmbahen nga çdo veprim që mund të rrezikojë stabilitetin në terren dhe të shpërqendrojë palët nga zbatimi i Marrëveshjes për rrugën drejt normalizimit të marrëdhënieve – që duhet të jetë prioriteti i tyre kryesor”, thuhet ndër të tjera në përgjigje.

Në anën tjetër, Lista Serbe u ka bërë thirrje KFOR-it, EULEX-it dhe BE-së që të ndalohet hapja e Urës së Ibrit.

“Ju bëjmë thirrje që të reagoni urgjentisht dhe t’i tregoni publikisht regjimit të Prishtinës se hapja e urës nuk mund të bëhet pa pëlqimin e serbëve që jetojnë në veri të Kosovës dhe M”, ka thënë Lista Serbe.