BE mbështet reformën për përfitimet e papunësisë për punëtorët ndërkufitarë, kosto shtesë të mundshme për Zvicrën

albinfo.ch

Këshilli i ambasadorëve të shteteve anëtare të Bashkimit Evropian ka mbështetur një reformë të skemës së sigurimit të papunësisë për punëtorët ndërkufitarë. Sipas ndryshimeve të propozuara, këta punëtorë do të përfitojnë kompensimet e papunësisë në vendin ku kanë punuar, dhe jo më në vendin e tyre të banimit. Ky ndryshim pritet të sjellë kosto shtesë për Zvicrën.

Sistemi aktual, që daton nga viti 2004, parashikon që punëtorët të kontribuojnë në sigurimin e papunësisë në vendin ku punojnë, edhe nëse jetojnë në një shtet tjetër. Megjithatë, në rast papunësie, përfitimet u paguhen nga vendi i banimit. Ky mekanizëm shpesh ka shkaktuar vonesa në pagesa dhe mospërputhje mes kontributeve të paguara dhe përfitimeve të marra, për shkak të vështirësive në koordinimin mes sistemeve kombëtare, transmeton albinfo.ch.

Sipas reformës së re, përfitimet do të jepen nga shteti ku punëtori ka qenë i punësuar për herë të fundit. Një diplomat evropian në Bruksel bëri të ditur se 21 shtete anëtare e mbështesin këtë ndryshim.

Lëvizja e lirë e personave

Sipas Presidencës qipriote të Këshillit të BE-së, personat që humbasin vendin e punës mund të marrin përfitime nga shteti ku kanë punuar për herë të fundit për një periudhë deri në gjashtë muaj.

Kjo rregullore lidhet me marrëveshjen për lëvizjen e lirë të personave ndërmjet Zvicrës dhe Bashkimit Evropian. Megjithatë, miratimi i saj mund të ndodhë vetëm “me pëlqimin e qartë të Zvicrës”, theksoi Sekretariati Shtetëror për Çështjet Ekonomike.