Bukuritë e Kosovës prezantohen në Zvicër

Në qendrën e Arteve, “Ibrahim Kodra”, në Melide të Zvicrës është hapur ekspozita “Bukuritë Natyrore të Kosovës”, që synon të forcojë dhe zgjerojë marrëdhëniet sociale dhe kulturore në mes Konfederatës Zvicerane dhe Kosovës, transmeton albinfo.ch.

Ministria e Punëve të Jashtme e Kosovës njofton se organizimi i kësaj ngjarje u bë fal bashkëpunimit me Komunën e Melides, Ambasadën e Kosovës në Bernë dhe Muzeun Kombëtarë të Kosovës, ndërsa ky projekt iu dedikua vitit 2017, i cili është shpallur nga Asambleja e 70-të e Kombeve të Bashkuara si Vit Ndërkombëtar i Zhvillimit të Qëndrueshëm të Turizmit për Zhvillim.

Drejtoresha e Artit të Fondacionit, “Ibrahim Kodra”, Maria Pacolli, prezantoi nismën e Kombeve të Bashkuara.

Ekspozita ka prezantuar fotografitë e realizuara nga fotografët ndërkombëtarë dhe pjesëmarrësit në garën e fotografisë më të mirë për promovimin e Kosovës për vitin 2017, e cila ishte organizuar pak kohë më parë nga Ministria e Punëve të Jashtme.

Autorët e fotografive të ekspozuara në këtë ekspozitë janë: Aleksandra Hiltmann, Arben Islami, Erza Rudi, Jeta Abazi Gashi, Maria Pacolli, Marieke Lebet-Booij, Shkëlzen Rexha, Yllka Fetahaj, Agon Nimani, Arian Mavriqi, Armend Nimani, Bleron Caka, Dea Lajqi, Sehida Miftari.

Në këtë ekspozitë është shërbyer edhe ushqim tradicional nga Kosova.