Dalin në shitje biletat për ndeshjen Kosovë-Kroaci

Bileta më e lirë do të kushtojë 7 euro, kurse biletat në tribunën VIP kanë një kosto më të lartë, 130 euro. Biletat tjera do të jenë 15, 20 dhe 55 euro

Ndeshja e parë historike e Kosovës si vendas po afron. Por, ky takim zhvillohet në Shkodër, pasi stadiumet kosovare nuk i plotësojnë kushtet, shkruan albinfo.ch.

Nga dita e sotme kanë dalë në shitje edhe biletat. Vetëm një sasi e vogël e biletave do të dalin në shitje para stadiumit “Loro Boriçi” në Shkodër në ditën kur Kosova do të luajë kundër Kroacisë më 6 tetor. Pjesa tjetër e biletave do të dalë në shitje nëpër të gjitha filialet e kompanive të transferimit të parave në Kosovë. Bileta më e lirë do të kushtojë 7 euro, kurse biletat në tribunën VIP kanë një kosto më të lartë, 130 euro. Biletat tjera do të jenë 15, 20 dhe 55 euro.

Ndeshja ndërmjet Kosovës dhe Kroacisë do të luhet më 6 tetor në Shkodër dhe nis në orën 20:45. Për Kosovën kjo do të jetë ndeshja e dytë eliminatore dhe e para si vendase. Takimi i parë ndaj Finlandës përfundoi 1:1.