Dashuri vëllazërore

Granit Xhaka është notuar me notën 6.9, derisa Taulanti me 5.9. Shkodran Mustafi kishte notën 8.2

(KEYSTONE/Gian Ehrenzeller)

Faqja zyrtare e Ligës së Kampionëve në ‘Twitter’, ka postuar një foto të vëllezërve Granit dhe Taulant Xhaka. “Dashuri vëllazërore”, ka shkruar faqja e Ligës së Kampionëve, përcjell albinfo.ch.

Dy futbollistët shqiptarë ishin titullarë, duke u ballafaquar me njëri-tjetrin edhe në garën më prestigjioze të futbollit evropian për klube.

Ndeshjen e fitoi Arsenali, duke mundur Baselin me rezultat 2:0, në një sfidë që u dominua nga londinezët.

Pas ndeshjes kanë ardhur edhe vlerësimet për lojtarët. Granit Xhaka është notuar me notën 6.9, derisa Taulanti me 5.9. Shkodran Mustafi kishte notën 8.2.

Pas ndeshjes kanë ardhur edhe komentet e lojtarëve. “Dhamë gjithçka në fushë, por nuk arritëm të dilnim me pikë. Kënaqësi e madhe të luash përsëri kundër vëllait”, ishte postimi i Taulant Xhakës në ‘Facebook’ menjëherë pas përfundimit të takimit, ku ndryshe nga sfidat e mëparshme, mes të dyve kishte rrallëherë përplasje direkte, pasi lojtari i Baselit ishte rreshtuar si qendërmbrojtës në këtë duel.

“Çfarë ndeshje! Çfarë emocione të luash kundër ekipit me të cilin mora hapat e parë. Çfarë adrenaline të përballesh me vëllain tënd. Ndeshje e paharruar. Gjithçka e përsosur. Faleminderit të gjithëve”, ka shkruar Graniti në ‘Facebook’ duke shpërndarë një fotografi me vëllain e tij.