De Biasi nuk e harron Shqipërinë

Gianni De Biasi nuk ka harruar ta përmendë kombëtaren e Shqipërisë në prezantimin e tij si trajner i Deportivo Alavesit në Spanjë.

Pas gjashtë vjetëve te kuqezinjtë, italiani është kthyer në La Ligë për të udhëhequr skuadrën që ka nisur në mënyrën më të keqe të mundshme sezonin e ri duke mos marrë asnjë pikë në gjashtë ndeshjet e para.

Në prezantimin e tij te klubi i ri, De Biasi ka treguar arsyet e largimit nga Shqipëria, përcjell albinfo.ch.

“U largova nga Shqipëria pasi ajo skuadër nuk shkonte dot në Rusi. Lojtarëve pas Europianit i iku dëshira dhe uria, kujtuan se arritën gjithçka. Më duhej t’i lija vendin një trajneri tjetër që të kishte mundësi të njihte skuadrën dhe ta përgatiste për në eliminatoret e ardhshme. Ai është një ekip i gatshëm tashmë dhe unë bëra një gjest dashurie ndaj Shqipërisë, Presidentit dhe tifozëve”, ka thënë De Biasi, transmeton Top-Channel.

Aventurën e re në Spanjë, De Biasi do ta fillojë fundjavën e ardhshme me ish-skuadrën që ka drejtuar më parë në sezonin 2007/08, Levanten.