Debutim për t’u harruar i Berishës

Në të vërtetë, ishte një debutim i hidhur për gardianin kuqezi, i cili personalisht bëri një paraqitje të mirë pavarësisht se pësoi tre herë

Portieri i Kombëtares shqiptare, Etrit Berisha, debutoi me skuadrën e tij të re Atalanta. Në të vërtetë, ishte një debutim i hidhur për gardianin kuqezi, i cili personalisht bëri një paraqitje të mirë pavarësisht se pësoi tre herë, duke u vlerësuar nga ‘Sportmediaset’ me notën 7, shkruan albinfo.ch.

Në “Sant’Elia” rezultati zhbllokohet që në minutën e tetë, kur Marco Borriello shënon golin e parë.

Në pjesën e dytë, kur luhej minuta e 55-të, Sau dyfishon epërsinë, në një episod ku Berisha mund të kishte reaguar më mirë. Në të 73-n, Borriello realizon një tjetër gol spektakolar nga goditja e dënimit për të vulosur fitoren e parë sezonale. Cagliari-Atalanta 3:0.

Kjo ishte ndeshja e parë për portierin kuqezi për skuadrën zikaltër, duke shpresuar se do të jetë edhe në ndeshjet tjera titullar. Berisha është zgjedhja numër një në Kombëtaren shqiptare.