Dënohen futbollistët gjermanë, i vunë flakën hotelit në Shqipëri

Vitaly Janelt, 18 vjeç dhe Idrissa Toure, 17 vjeç janë dënuar me dhjetë mijë euro dhe një punë të detyrueshme me kohë të pjesshme në një qendër të azilit

Dy futbollistë të Kombëtares gjermane deri në 19 vjeç janë shndërruar në një shembull negativ gjatë eliminatoreve të Kampionatit Evropian 2017, që u zhvillua në Shqipëri. Në një nga ndeshjet e luajtura, Vitaly Janelt, 18 vjeç dhe Idrissa Toure, 17 vjeç, janë larguar nga hoteli duke lënë një nargjile të ndezur në dhomë, shkruan albinfo.ch.

Pas disa minutash, ajo për pak i ka vënë flakën dhomës, por falë ndërhyrjes së punonjësve të hotelit është sistemuar çdo gjë.

Mediat gjermane shkruajnë se menjëherë Federata e Gjermanisë ka vendosur që t’i kthejë menjëherë në shtëpi të dy lojtarët me shpenzimet e tyre dhe përveç kësaj në bashkëpunim me klubin i kanë gjobitur me nga 10 mijë euro dhe një punë të detyrueshme me kohë të pjesshme në një azil. Ata janë dënuar edhe nga klubi gjerman, Leipzig.

Për një nargjile që harruan ndezur të dy futbollistët për pak dogjën dhomën e hotelit në Shqipëri, por tani rrezikojnë të kenë djegur dhe karrierën e tyre në Kombëtare.