Deputeti italian, shqiptarit: Krimi yt na ka kushtuar 6500 euro

Deputeti italian, Angelo Ciocca i Partisë së Djathtë “Lidhja e Veriut” ka turpëruar të riun shqiptar Stef Tuci, 26-vjeçar, që mbeti i plagosur me armë pasi shkoi të vidhte pronarin e një vile në Itali.

I gjetur në kushtet e vetëmbrojtjes pronari 56-vjeçar i vilës ka qëlluar me armë të riun duke e plagosur në këmbë.

Deputeti italian Ciocca i ka shkuar në spitalin e San Matteos shqiptarit bashkë me një pankartë ku shkruhej “Krimi yt na ka kushtuar 6500 euro”, përcjell albinfo.ch.

Ai ka zgjedhur t’i ndajë këto momente me ndjekësit, përmes një postimi në “Facebook”.

“Ky shqiptar, është pa leje të rregullt qëndrimi në Itali, është një kriminel që ka ardhur vetëm për të grabitur. Ne, qytetarët e shteti italian pas gjestit të tij kriminal prej 10 ditësh po e kurojmë në një nga spitalet më të mira të territorit të Lombardisë, me një shpenzim prej 6500 euro. Ky zotëri, duhet të na kërkojë falje e të kthehet në vendin e tij”, ka deklaruar deputeti.