Deputetit të Kosovës i konfiskohet pasaporta

Deputeti i Parlamentit të Kosovës nga Nisma, Milaim Zeka do të qëndrojë për një muaj arrest shtëpiak me vendim të Gjykatës Themelore të Prishtinës, shkruan albinfo.ch.

Ai u arrestua një ditë më parë për dyshimet për përfshirje në skandalin me viza pune në Gjermani. Zeka ka mohuar se është i përfshirë në këtë skandal, ku akuzohet edhe për fshehje të tatimit.

Me këtë rast, Gjykata Themelore e Prishtinës, ka njoftuar se deputetit Zeka i është konfiskuar edhe pasaporta.

“Gjykata Themelore në Prishtinë-Departamenti për Krime të Rënda, me kërkesë të Prokurorisë Speciale të Republikës së Kosovës, për caktimin  e paraburgimit kundër të pandehurit M. Z, për shkak të dyshimit të bazuar se ka kryer veprat penale pjesëmarrja ose organizimi i grupit kriminal të organizuar nga neni 283 par.1 lidhur me veprat penale Mashtrimi nga neni 335 par.5 lidhur me par.1 të KPRK-së dhe Shmangia nga tatimi nga neni 313 par. 3 lidhur me par.1 të KPRK- së, sot ka mbajtur seancën dëgjimore me ç’rast kundër të pandehurit M. Z. është caktuar masa e Arrestit Shtëpiak në kohëzgjatje prej një muaji, e cila masë do të zgjasë nga data 16.10.2017 deri me datë 16.11.2017. Të pandehurit M. Z i sekuestrohet dokumenti i udhëtimit – pasaporta. Pala ka të drejtë ankese në Gjykatën e Apelit të Kosovës”, thuhet në njoftim.

Ndërkohë, avokati i Zekës ka thënë se do të ankohet në këtë vendim.