Dialogu ndërmjet Prishtinës dhe Beograd zgjat dy ditë

BE:Dialogu do të përqendrohet në problemet praktike, siç janë kontrolli i kufijve dhe dokumentet personale

Dialogu i parë i drejtpërdrejtë midis Prishtinës dhe Beogradit, pas shpalljes së pavarësisë së Kosovës, do të fillojnë nesër në Bruksel dhe do të zgjas dy ditë, ka njoftuar sot BE-ja, e cila do të mbikëqyr këtë dialog.

Me ndërmjetësimin e përfaqësuesit të BE-së, Robert Cooper, sipas agjencisë Associated Press, dialogu do të përqendrohet në problemet praktike, siç janë kontrolli i kufijve dhe dokumentet personale, ndërkaq çështjet politike do të shmangen.

Delegacionin e Prishtinës do ta kryesojë zëvendëskryeministrja Edita Tahiri, ndërsa atë serb drejtori politik në Ministrinë e Punëve të Jashtme të Serbisë, Boris Stefanoviq.

Ndërkohë, ambasadorja amerikane në Serbi, Mary Warlick ka thënë sot se SHBA-të përkrahin fillimin e dialogut midis Prishtinës dhe Beogradit, të cilat, sipas saj, duhet të zgjidhin çështje kyçe.

“Është shumë me rëndësi që bisedimet të fillojnë dhe të dyja palët të zgjidhin çështje që do të përmirësonin kushtet e jetesës së njerëzve në Serbi dhe Kosovë”, ka thënë Warlick.

Ajo është shprehur e bindur se të dyja palët këtë javë do të ulën në të njëjtën tavolinë në Bruksel me vullnet të mirë dhe optimizëm.

“SHBA-të do të ofrojnë përkrahje të plotë në këto bisedime dhe të dyja palëve u dëshirojnë bisedime të suksesshme”, ka thënë ambasadorja amerikane në Beograd.

Ndryshe, ende është duke vazhduar debati në Kuvendin e Kosovës për miratimin e një rezolute që do të hapte rrugën e fillimit të dialogut me Beogradin.

Partitë opozitare janë duke e kundërshtuar gjatë debatit parlamentar draft-rezolutën e përgatitur nga Qeveria.