Dick Marty e prezanton nesër raportin

Sot fillon debati në Asamblenë Parlamentare të Këshillit të Evropës rreth raportit që ka të bëjë me Kosovën dhe rajonin në tërësi, ndërsa së pari do të shqyrtohet raporti i Dick Martyt për trafikim organesh, për të cilin do të votohet nesër.

Në mbledhjen plenare të Asamblesë Parlamentare, senatori zviceran nesër do ta prezantojë raportin e të bërë publik në dhjetor të vitit të kaluar. 

Ndërsa të mërkurën Asamblesë Parlamentare do t’i drejtohet presidenti serb Boris Tadiq dhe kryeministri shqiptare Sali Berisha.

Pjesëmarrjen e ka paralajmëruar edhe delegacioni i Kuvendit të Kosovës. Kosova nuk është anëtare e Këshillit të Evropës, por zëvendësministrja e Jashtme e Kosovës, Vlora Çitaku, ka theksuar se “qysh nga viti i kaluar u është lejuar pjesëmarrja në punimet e institucioneve të Këshillit të Evropës kur bëhet fjalë për Kosovën”.

Delegacioni i Shqipërisë dhe deputetja e BDI-së në Maqedoni, Ermira Mehmeti-Devaja, do të prezantohet me qëndrim unik lidhur me raportin e Dick Martyt. Sipas mediave shqiptare, Ministria e Jashtme e Shqipërisë ka përgatitur një raport prej katër faqesh që do t’ia dorëzojë Këshillit të Evropës, si përgjigje zyrtare e Tiranës ndaj raportit të Martyt.

Ndërkohë Këshillit të Evropës do t’i dorëzohet edhe peticioni, i iniciuar nga shoqatat e dala nga lufta e UÇK-së, të cilët brenda dy javësh mblodhën nënshkrime në Kosovë, Shqipëri, Maqedoni dhe Luginën e Preshevës që kundërshtojnë projekt-raportin e senatorin zviceran.

Beogradin në këtë mbledhje do ta përfaqësojë delegacion i Kuvendit të Serbisë në Asamblenë Parlamentare të Këshillit të Evropës, në krye me Dragolub Miçunoviq, ndërsa detyra kryesore e tyre do të jetë zbutja e rezolutës nëpërmjet amendamenteve dhe që të sjellin europarlamentarët që së më shumë sish të votojnë për rezolutën.