Droga në “valixhen diplomatike” zvicerane

Në emër të dërguesit dilerët kishin vënë adresën: "Ambasada e Zvicrës në Peru"

11 kg. kokainë në “bagazhin diplomatik” zviceran janë postuar, sipas asaj që shkruante në valixhe, nga Ambasada e Zvicrës në Peru.

Por dërgesa është kapur në aeroportin e Madridit para se të mbërrinte në adresën e dëshiruar, te një grup tregtarësh të drogës në perëndim të Spanjës.

E alarmuar nga policia, Ambasada e Zvicrës në Madrid i ka deklaruar gazetës “El Pais” se bëhet fjalë për falsifikim të kryer nga një organizatë kriminale. Me këtë rast janë arrestuar dy burra dhe një grua me dyshimin se ishin porositës të dërgesës me kokainë.

Ndërsa policia spanjolle vazhdon ta ndjekë çështjen në kuadër të një hetimi më të gjerë, ka njoftuar Departamenti i Jashtëm i Zvicrës.

Për diplomatët zviceranë ky ishte rasti i parë në përgjithësi që ndodh diçka e tillë. Ndërkaq në Spanjë ka ndodhur edhe në mjaft raste tjera që valixhet diplomatike të përdoren për të bartur drogë.