Edhe 130 ushtarë rumunë i shtohen KFOR-it

Ministria rumune e Mbrojtjes ka njoftuar se misionit të KFOR-it i janë shtuar edhe 130 ushtarë rumunë.

“Ushtria rumune ka përfunduar shtimin e kontingjentit pjesëmarrës në operacionin e KFOR-it të NATO-s në Kosovë, me gjithsej 130 ushtarë. Vendimi për shtimin e forcave rumune është marrë si rezultat i autorizimit nga Këshilli i Atlantikut të Veriut për plotësimin e forcave për menaxhimin e situatës aktuale në Ballkanin Perëndimor”, thuhet tutje në njoftim.

KFOR-i është duke shtuar numrin e trupave në Kosovë pas sulmit terrorist të 24 shtatorit ndaj Policisë së Kosovës, ku mbeti i vrarë rreshteri Afrim Bunjaku.