Edhe në Kosovë kërkohet azil

Deri më tash, 53 persona janë duke qëndruar në Kosovë, ndërkohë që 51 prej tyre shteti u ka kthyer përgjigje negative

Në Kosovë janë shtuar kërkesat për azil. Në Qendrën për Azil në Prishtinë, më së shumti ka azilkërkues nga Afganistani – 21 sosh. Janë edhe 15 palestinezë, tre iranianë, dy koreanë dhe nga një nga Bregu i Fildishtë, Maroku, Nigeria, Pakistani, Somalia, Sudani dhe Tunizia, të cilët kanë kërkuar azil në shtetit më të ri të botës.

Islam Caka, drejtor i Departamentit për Shtetësi dhe Azil në Ministrinë e Punëve të Brendshme (MPB)., në një konferencë për media, ka bërë të ditur se deri më tash, 53 persona janë duke qëndruar në Kosovë, ndërkohë që 51 prej tyre shteti u ka kthyer përgjigje negative, pra që nuk u pranohet azili.

Por, asnjë prej tyre, nuk do të mund ta fitojë azilin për shkak se nuk i plotësojnë kushtet.

“Aktualisht në kuadër të departamentit asnjë vendim nuk është pozitiv për arsye se shumica prej tyre nuk i kanë plotësuar kushtet ose pretendojnë ta përdorin Kosovën si transit. Moshat dhe shtetet janë të ndryshme”, ka thënë Caka.

Të gjithë shpresojnë marrjen e shtetësisë kosovare, ndërkohë që 1 mijë e 19 kosovarë kanë hequr dorë nga kjo e drejtë, duke zgjedhur shtetësinë e vendit ku kanë fituar azilin.

“Mirëpo, jo të gjithë janë të strehuar në shtëpinë e azilit që gjendet në Prishtinë. Për shkak të mungesës së objekteve, një numër i azilkërkuesve është vendosur në hotel ‘Gowana’ në periferi të Prishtinës. Për këtë shkak, Kosova shpenzon nga 39 euro në ditë për person për akomodimin e secilit”, ka thënë një Caka.

Pritet që së shpejti të ndërtohet edhe një qendër e izolimit për azilkërkuesit, e që do të ketë shpenzime më pak.

“Kjo qendër pritet të ndërtohet në fshatin Magure dhe do të financohet nga Komisioni Evropian, dhe do të jetë lehtësim për ne”, ka thënë Caka.