Ekspozita “Besa” së shpejti edhe në Bernë

Ekspozita e radhës hapet në Bernë ndërsa manifestimet shoqëruese do të shtrihen deri më 3 janar të vitit 2015

Vargu i aktiviteteve në kuadër të projektit të ekspozitës shëtitëse “Besa” për këtë vit përmbyllet me ekspozitën që më 9 dhjetor do të hapet në Bernë dhe me manifestimet shoqëruese që do të shtrihen deri më 3 janar të vitit 2015. 

Solemniteti i hapjes së ekspozitës bëhet më 9 dhjetor me fillim në orën 19.00 në Stadtsaal, Kornhausforum. Me fjalët e tyre përshëndetëse do të paraqiten Alexander Scmidt, këshilltar (nga ekzekutivii) i qytetit të Bernës, Lea Kusano, ish këshilltare, Dr. Herbert Winter, kryetar i Federatës së Shoqatave Izraelite të Zvicrës (SIG) dhe Dr.Bashkim Iseni, drejtor i platformës albinfo.ch.

Ndërsa prezantimi publik i ekspozitës bëhet më 18 dhjetor me fillim në orën 18.00, me ç`rast miqtë e shoqatës “Yad Vashem” ftojnë publikun në prezantim të ekspozitës.

Krahas ekspozitës që mbetet e hapur deri më 3 janar 2015, në këtë hark kohor do të ketë edhe në varg aktivitetesh që ndërlidhen me të. Kështu, filmi “Besa-The Promise” do të shfaqet të dielën, më 14 dhjetor nga ora 19 dhe të enjten, më 18 dhjetor nga ora 20.30 në kinemanë “Cinemàtte”. Ky film dokumentar amerikan tregon se si një qytetar shqiptar, Rexhep Hoxha, përpiqet të gjejë familjen hebreite të cilën 60 vite më parë babai i tij e kishte strehuar në shtëpinë e vet për të mbajtur premtimin ose “Besën” që ia ka dhënë babait të tij: duke ia dërguar familjes në fjalë librat e lutjes në hebraishte që ajo i kishte lënë në Shqipëri.

Ekspozita do të ketë edhe një prezantim publik, më 12 dhjetor 2014 që do ta bëjë Shpresa Jashari, studiuese e gjuhës dhe kulturës nga Universiteti Neuchatel .