ETH: Për ashpërsim kriteri dhe dyfishim të pagesës për studime

Nuk përjashtohet një dyfishim i kësaj pagese, gjegjësisht nga 1300 sa është tash, në 2600 franga

I porsazgjedhur në postin e rektorit të universitetit ETH të Cyrihut, Lino Guzzella, qysh me prononcimet e tij të para ka tërhequr vëmendjen e opinionit.

Në një intervistë për “NZZ am Sonntag” rektori i ri i universitetit më prestigjioz në Zvicër është shprehur për një kriter më të fortë të pranimit të studentëve në universitete. Dhe shkalla e parë për ngritjen e nivelit të studimeve është gjimnazi.

Sipas tij kriteret për pranim në gjimnaz duhet të ashpërsohen. “Gjimnazet duhet të trajtohen si shkolla elite. Testet për pranim në to janë tepër të thjeshta dhe të lehta”.

Tema e radhës të cilën ai ka ngritur në këtë intervistë, ka qenë shtrenjtimi i pagesës për regjistrimin e vitit në ETH. Sipas tij nuk përjashtohet një dyfishim i kësaj pagese, gjegjësisht nga 1300 sa është tash, në 2600 franga.

Këtë propozim Guzzella e bën për shkakun se sipas tij, me gjithë rritjen e numrit të studentëve për 60 për qind në dhjetë vitet e fundit pothuaj se nuk ka pasur rritje të buxhetit të këtij universiteti.