EULEX-i heton 93 raste të korrupsionit e krimit të organizuar

Nga hetimet për krim të organizuar dhe korrupsion nuk do të përjashtohen as zyrtarët e lartë të institucioneve të ndryshme kosovare

EULEX-i është duke hetuar më shumë se 90 raste që kanë të bëjnë me korrupsion dhe krim të organizuar, kanë bërë të ditur përfaqësues të këtij misioni. Sipas tyre, deri tash janë marrë 46 vendime për raste të tilla.

Zëdhënësi i EULEX-it, Nikollas Hotwn, ka thënë se nga hetimet për krim të organizuar dhe korrupsion nuk do të përjashtohen as zyrtarët e lartë të institucioneve të ndryshme kosovare.

“Nuk do të komentoja detajet e hetimeve apo individët që po hetohen. Ajo që mund të them është se EULEX-i do të hetojë rastet serioze të krimit të organizuar e korrupsionit kudo që ndodhin këto krime dhe këdo që përfshijnë ato”, ka deklaruar Hotwn.

Ditë më parë, me urdhër të prokurorëve të EULEX-it, ishte arrestuar ish-kreu i Task-Forcës kundër Korrupsionit, Nazmi Mustafi, i cili bashkë me Reshat e Xhelal Zherkën dyshohet të jenë të përfshirë në shpërdorim të detyrës apo autoritetit zyrtar dhe ushtrim të ndikimit./rel&albinfo/