EULEX nis hetimet kundër krimit të organizuar

Të akuzuarit ngarkohen për trafikim të drogës dhe krim të organizuar

EULEX-i ka ngritur aktakuzë në një rast madhor të krimit të organizuar. “Më 23 dhjetor 2010, në Gjykatën e Qarkut në Prishtinë, një prokuror i EULEX-it ngriti një padi kundër tre personave.

Të akuzuarit ngarkohen për trafikim të drogës dhe krim të organizuar. Rasti rrjedh nga një hetim i ndërmarrë nga Drejtoria Kundër Krimit të Organizuar e Policisë së Kosovës, në fund të vitit 2008 nën udhëheqjen e prokurorit special të EULEX-it. Për shkak të natyrës ndërkufitare të grupit kriminal, hetimet janë kryer në bashkëpunim me autoritetet homologe nga vendet e Ballkanit dhe Evropës Perëndimore.

Dy nga të akuzuarit u arrestuan në Kosovë në maj 2010, ndërsa i treti më 4 dhjetor 2010, në pajtim me urdhër-arrestin e lëshuar nga një gjyqtar i EULEX-it. Të gjithë personat janë në paraburgim dhe në pritje të procedurave të mëtejshme”, thuhet veç tjerash në një njoftim të EULEX-it, të transmetuar nga mediet kosovare.