Euronews e targeton Ksamilin si destinacionin e preferuar duke e quajtur ‘Maldivet e Evropës’

Beautiful Ionian Sea with clear turquoise water, wooden pier and morning summer coast view from beach (Ksamil, Albania). Two shots stitch image.

Plazhet me ujëra kristal të Ksamilit, që kanë fituar vlerësimin e Euronews si “Maldivet e Evropës,” kanë filluar të tërheqin turistët e parë të huaj, duke i dhënë fillimin sezonit turistik në këtë destinacion të njohur.

Sipas një artikulli në euronews.com, është vetë ky rrjet informativ që ka etiketuar Ksamilin si “Maldivet e Evropës,” duke i dhënë një vlerësim të lartë këtij vendi të mrekullueshëm.

Emri i Ksamilit ka filluar të përhapet gjithnjë e më shumë në mediat britanike, gjë që ka çuar në një rritje të numrit të turistëve nga Britania, por edhe vende të tjera. Një çift skocez, që ka vendosur të kalojë disa ditë në Ksamil, tashmë ka planin për t’u rikthyer gjatë verës për të shijuar më shumë këtë destinacion.

“Unë jam Xheini nga Skocia dhe, si një përshtypje e parë për Shqipërinë, mund të them që ky vend është jashtëzakonisht i bukur. Ne sapo kemi ngrënë mëngjesin dhe ishte një përvojë fantastike; natyra është magjepsëse dhe ushqimi shumë i shijshëm, ndërsa kafja ishte perfekte. Dielli është gjithashtu i shkëlqyer për këtë periudhë të vitit. Sa i përket çmimeve, gjithçka është e drejtë dhe në përputhje me cilësinë e shërbimit dhe ushqimit që kemi marrë,” shprehet ajo.

Për operatorët turistikë, turistët britanikë, francezë dhe gjermanë po dominojnë këtë fillim sezoni. Ata presin që fluksi të rritet në muajt në vazhdim, veçanërisht pas muajit qershor, ndërkohë që kushtet atmosferike mund të kenë penguar një fluks të menjëhershëm, përcjell albinfo.ch.

“Turistët britanikë janë më të shumtë për momentin, pasi kanë investuar shumë në marketing dhe janë shumë të interesuar për Shqipërinë. Pas tyre vijnë francezët dhe gjermanët, të cilët i konsiderojmë gjithashtu vizitorë të shkëlqyer. Mendojmë se sezoni turistik këtë vit do të jetë shumë i jashtëzakonshëm, sidomos pasi koha do të përmirësohet nga qershori e tutje. Ky fillim i hershëm i sezonit mund të sjellë një fluks të madh turistësh deri në shtator,” thotë Nevzad Salihi, operator turistik.

Ky vit duket të ketë një rritje të ndjeshme të numrit të turistëve në Ksamil, ndërkohë që industria e turizmit është e gatshme të mirëpresë një fluks më të madh krahasuar me vitin e kaluar.

Ksamil vazhdon të mbetet një nga destinacionet më të pëlqyera nga të rinjtë evropianë që vizitojnë Shqipërinë, duke ofruar një përvojë të paharrueshme pushimesh.