Evropa prezanton Ligjin për klimën, aktivistja Thunberg e quan dështim

Komisioni Evropian ka prezantuar Ligjin për klimën, që synon ta bëjë Evropën vend me zero emetime të dyoksidit të karbonit.

Mirëpo, aktivistja suedeze për klimën, Greta Thunberg, dhe shumë organizata joqeveritare kanë bërë thirrje për zbatimin e masave më të serta për ndaljen e krizës klimatike, ndërsa ligjin e kanë cilësuar si dorëzim të bllokut evropian para betejës klimatike, raporton KTV.

Ligji është prezantuar gjatë një takimi, në të cilin mori pjesë edhe aktivistja suedeze. Tani pritet miratimi i Parlamentit Evropian dhe pas kësaj, 27 vendet anëtare të bllokut obligohen që të reduktojnë emetimin e gazeve në pikën zero deri në vitin 2050.

Sipas ligjit, viti 2050 është caku i Evropës, por emetimi i gazeve mund të reduktohet në zero edhe më herët nëse shumë shtete e zbatojnë planin para kohe.

Aktivistja Thunberg, së bashku me 33 kolegë të saj, ka deklaruar se planet për uljen e emetimeve duhet të përpilohen menjëherë dhe jo të caktohen afate të ndryshme kohore.

Ekspertët kanë bërë të ditur se ligji do t’i japë mundësi shtesë Brukselit që t’u bëjë presion shteteve para vitit 2030. Duke filluar nga viti 2023, Komisioni do t’i identifikojë vendet anëtare që nuk u janë përmbajtur synimeve në luftën kundër ndryshimeve klimatike, përcjell Albinfo.ch.