Facebooku teston veçorinë e “heshtjes”

Me këtë veçori përdoruesit e Facebookut mund të heshtin dikë tjetër për një ditë, një javë apo edhe një muaj

Përderisa jeni mik me dikë në Facebook, nuk do të thotë që ai/ajo nuk ju pengon me ndonjë veprim. Bezdia nga dikush është e përhershme në rrjetet sociale, ku postimet nuk ndalen.

Nëse një mik ju bezdis, ju mund të konsideroni fshirjen e tij nga rrjeti social. Edhe pse ky është veprim ekstrem, është diçka që ndodh shpesh në rrjete sociale. Nganjëherë ndiheni se mos është i tepërt dhe për këtë arsye Facebooku ka gjetur zgjidhjen.

Ky rrjet social po e teston funksionin “Snooze”, përmes të cilit mund të largoni një mik përkohësisht.

“TechCrunc” raporton se “Snooze” mund të heshtë për një kohë një mik, faqe apo grupe të caktuara. Kjo është metodë shumë më “e butë” në krahasim me fshirjen e një personi.

Me këtë veçori përdoruesit e Facebookut mund të heshtin dikë tjetër për një ditë, një javë apo edhe një muaj.

“Jemi duke testuar mënyra të reja që njerëzit të kontrollojnë më lehtë Facebookun ashtu që të jenë të lidhur më shumë me ngjarjet që ata i shohin më të rëndësishme”, ka thënë Facebooku, përcjell albinfo.ch.