Fëmijët e emigrantëve të kthyer nuk e njohin shqipen

Kriza ekonomike që ka përfshirë Italinë dhe Greqinë ka detyruar emigrantët shqiptarë të gjejnë si zgjidhje kthimin në vendlindje.

Gjatë vitit 2013, sipas raportit “Fëmijët në lëvizje”, në Shqipëri rezultojne se janë mbi 1 mijë fëmijë shqiptarë, të cilët hasin vështirësi të mëdha për të përfituar nga sistemi arsimor, pasi nuk e njohin gjuhën shqipe.

“Të dhënat e mbledhura nga intervistat dhe burime të ndryshme tregojnë se numri i fëmijëve që janë kthyer vetëm gjatë periudhës janar-shtator 2013 nga Greqia dhe nga Italia, flasin për 451 fëmijë nga Greqia dhe 758 fëmijë nga Italia. Pra, është një numër i konsiderueshëm dhe shumica e këtyre fëmijëve nganjëherë nuk e flasin fare gjuhën shqipe, pra nuk mund të shkojnë as në shkollë, nuk e dinë ku të shkojnë, apo nuk janë të regjistruar. Ata kanë lindur në një vend tjetër dhe nuk e kanë regjistrimin e tyre në Shqipëri dhe duhet të presin me muaj të tërë”, tha Jezerca Tigani, drejtoreshë e “Terre Des Homes”.