Ferati konkretizon ëndrrën e tij për Bundesligën

Që nga fëmijëria e hershme ka qenë ëndërr e Feratit të luajë në një skuadër të bundesligës. Verën që vjen, ai bëhet pjesë e SC Freiburg

Lojtari standard i klubit FC Basel, shqiptari nga Kosova, Beg Ferati ka bërë të ditur se në përfundim të sezonit veror do të braktisë skuadrën e tij, për të vazhduar karrierën në SC Freiburg të Bundesligës gjermane.

Siç shkruan gazeta zvicerane Blick, skuadra ku kalon Ferati nuk dallohet për pagesa të larta për futbollistët që i blen. Mirëpo, është diç tjetër që ka tërhequr futbollistin nga Kosova për të zgjedhur Freiburgun. Që nga fëmijëria e tij e hershme  ka qenë ëndërr për të që të luajë në një skuadër të bundesligës së famshme. Kështu pati deklaruar Ferati në një rast. Dhe, duket se kjo ëndërr e tij po bëhet realitet.

Këtë synim të Beg Feratit e përforcon edhe zëvdendëskryetari i FC Basel-it, Bernard Heusler. Ai, lidhur me rastin Ferati i ka deklaruar gazetës Blick se „as oferta jonë për t`i përmirësuar pagesën nuk bëri punë…”

FC Basel, që është skuadra më e suksesshme dhe më e pasur zvicerane, po përballet kohëve të fundit me një „erozion” lojtarësh. Disa nga futbollistët më të mirë të klubit gjenden në vazhdimësi në shënjestër të skuadrave të huaja, të mëdha të futbollit.

Futbollisti tjetër shqiptar, Xherdan Shaqiri është vetëm njëri prej tyre, mbase më i kërkuari, por aty diku janë edhe Stocker, Inkoom, Safari etj.