Foda: Ne do të luftojmë për vendin e dytë

Kosova synon vendin e dytë në Ligën B, Foda tregon objektivat për edicionin e ri të UEFA Nations League

Përfaqësuesja e Kosovës po përgatitet për sfidat në Ligën B të UEFA Nations League, ndërsa përzgjedhësi Franco Foda ka bërë të qarta objektivat e ekipit. Ai theksoi se Austria mbetet favorite e grupit, por “Dardanët” do të luftojnë maksimalisht për pozitën e dytë dhe për të ruajtur statusin në këtë nivel të garës.

Foda vlerësoi se grupi është shumë konkurrues dhe çdo pikë ka peshë të madhe. “Është e qartë se Austria është favorite, por është një grup interesant. Qëllimi ynë është të bëjmë gjithçka për ta arritur vendin e dytë, sepse është një grup i fortë. Të paktën duhet ta ruajmë nivelin dhe të mos biem në Ligën C”, deklaroi ai.

Përzgjedhësi foli edhe për rikthimin e tij në Austri, duke e cilësuar përballjen me ish-lojtarët e tij si një moment emocional. Foda shprehu kënaqësinë që do të luajë kundër tyre dhe shpreson në mbështetje të madhe nga tifozët shqiptarë në Austri, megjithatë theksoi se përqendrimi i tij mbetet te përgatitjet për ndeshjet e muajit mars.

Kosova do të nisë këtë aventurë me synimin për të vazhduar me paraqitje pozitive dhe për të dëshmuar se i përket Ligës B të UEFA Nations League.

---