Franca refuzon kthimin e familjes Dibrani

Autoritetet franceze kanë përsëritur të martën se nuk do të bëjnë lëshim ndaj familjes rome Dibrani, nga Kosova, e dëbuar më parë nga Franca

“Qeveria nuk do të flasë fare për situatën e kësaj familje, e cila është dëbuar në mënyrë legale dhe e cila duhet ta dijë se nuk është e mirëseardhur në Francë”, ka deklaruar në parlamentin, sekretari shtetëror i Francës për marrëdhënie me parlamentin, Jean-Mari Le Gan.

Leonarda Dibranin, më 9 tetor të vitit 2013 policia franceze e pati arrestuar në shkollë për ta kthyer në Kosovë së bashku me anëtarët tjerë të familjes, si imigrantë ilegalë.

Anëtarët e familjes në ndërkohë kanë marrë pasaporta kroate me shpresë se mund të kthehen në Francë ku më herët ishin paraqitur si azil-kërkues.

Pasi që Dibranët morën shtetësinë kroate, teorikisht mund të ktheheshin në Francë, pasi që Kroacia është anëtare e BE-së, shkruan indeksonline.net.

“Edhe pse kanë marrë pasaporta kroate atyre nuk iu jepet e drejta që të qëndrojnë në Francë”, ka thënë Le Gan.

Kryeministri francez, Manuel Vals ka deklaruar në muajin maj se familja rome nga Mitrovica nuk mund të kthehet në Francë.