Futbollistët kuqezi gëzohen për Kosovën

Lorik Cana, Etrit Berisha, Berat Gjimshiti, Arlind Ajeti, Shkëlzen Gashi e të tjerët uruan pranimin e Kosovës në UEFA

Lajmit të pranimit të Kosovës me të drejta të plota në UEFA i janë gëzuar edhe futbollistët shqiptarë që mbrojnë ngjyrat e Kombëtares. Shumica prej tyre kanë uruar Kosovën për këtë lajm historik, shkruan albinfo.ch.

Portieri Etrit Berisha dhe kapiteni i Shqipërisë, Lorik Cana kanë uruar Kosovën për anëtarësimin në UEFA. Gardiani kuqezi ka postuar një ‘selfie’ duke e shoqëruar edhe me shkrimin “Urime Kosovë pranimi në UEFA”, derisa Cana ka shkruar: “Urime Kosovë. Më në fund izolimi ka përfunduar”.

Edhe Alban Meha, i është gëzuar pranimit të Kosovës. “Pa asnjë dyshim ky është lajmi më i mirë i shekullit për sportin e Kosovës. Për këtë duhet t’i falënderojmë të gjithë ata që kanë kontribuar për futbollin e Kosovës. Urime për të gjithë shqiptarët, anembanë!”.

Listës së urimeve nuk ka mundur t’iu mungojë as Shkëlzen Gashi, i cili luan në Kampionatin Amerikan, derisa është anëtar i Kombëtares shqiptare. “Ditë e madhe për futbollin. Faleminderit UEFA dhe urime Kosovë”. Edhe Berat Gjimshiti, Arlind Ajeti, Milot Rashica, Liridon Latifi, Bekim Balaj, Sokol Cikalleshi, e të tjerët kanë uruar për pranimin e Kosovës me të drejta të plota në UEFA.