Gashi nuk ndalet, tjetër çmim në Amerikë

Shkëlzen Gashi është “mbreti” i rrjeteve sociale në kampionatin amerikan të futbollit për vitin 2016. Për Gashin nuk kishte rivalë në çdo raund dhe ditët e fundit dominoi edhe në finalen kundër Justin Meram, duke fituar me më shumë se 61% të votave

Sulmuesi i Kombëtares shqiptare, Shkëlzen Gashi ka fituar tjetër çmim në Amerikë. Gashi është “mbreti” i rrjeteve sociale në kampionatin amerikan të futbollit për vitin 2016, shkruan albinfo.ch.

Ky është përfundimi i sondazhit të organizuar nga vetë MLS, ku sulmuesi shqiptar ka fituar pa probleme ndaj kujtdo që i ka dalë përpara në votime, ka bërë të ditur faqja zyrtare e klubit.

Gashi ka rënë menjëherë në sy si një personazh mjaft i veçantë në SHBA, ndërsa argëton rregullisht mbështetësit e tij të shumtë me postime në rrjetet sociale.

Ndaj ishte normale që ai të përfshihej mes kandidaturave për lojtarin më social, ku përballë kishte emra si David Villa, Andrea Pirlo apo Kaka. Por për Gashin nuk kishte rivalë në çdo raund dhe ditët e fundit dominoi edhe në finalen kundër Justin Meram, duke fituar me më shumë se 61% të votave.

Ky çmim sigurisht që i bën një mbyllje më se të mirë vitit të parë të Gashit në SHBA, ku arriti deri në finalen e Konferencës me Colorado Rapids, si dhe fitoi votimin për “Golin e Vitit”.