Gjashtë muaj afat Kosovës për progres

Komisionari për Zgjerim i BE-së, Stefan Fuele ka qenë i prerë sot se Kosova duhet të bëjë progres për gjashtë muajt e ardhshëm po qe se dëshiron të ketë një raport pozitiv.

Fuele ka përsëritur perspektivën e qartë evropiane për Kosovën, në një linjë me vendet e tjera të Ballkanit Perëndimor, por, sipas tij, i mbetet Prishtinës për të punuar në këtë drejtim.

Këto komente i ka bërë Fuele pas takimit që pati me ministren për Integrim, Vlora Çitaku në Bruksel. Sipas Fueles, Komisioni Evropian është i përfshirë ngushtë në dialogun Beograd-Prishtinë, që, sipas tij, do të sjellë Kosovën dhe Serbinë më afër BE-së.

Fuele kujtoi gjithashtu se Komisioni Evropian do të publikojë progres-raportin për Kosovën më 12 tetor, ndaj, sipas tij, kanë mbetur vetëm gjashtë muaj për të shënuar progres konkret sa i përket miratimit të legjislacionit dhe implementimit të masave të kërkuara.

“Kosova duhet të përmbushë perspektivën e saj evropiane dhe të ecë përpara drejt demokracisë, ndërtimit të institucioneve, luftës kundër korrupsionit dhe të përmirësojë jetën e qytetarëve të saj”, ka thënë Fuele.