Gjashtë të vdekur nga një zjarr në Solothurn

Keystone

Në një zjarr në një godinë banimi në Solothurn, natën e së hënës kanë vdekur gjashtë banues. Në mesin e tyre kishte edhe fëmijë, shkruajnë mediat zvicerane, përcjell Albinfo.ch.

Për arsye ende të panjohura, gjatë natës së hënë, në një godinë banimi në Solothurn ishte shkaktuar një zjarr. Në orën 02:10, një banor kishte vërejtur tymin nëpër shkallë dhe menjëherë ka alarmuar qendrën e emergjencës.

Menjëherë është mobilizuar një kontingjent i madh i forcave të shpëtimit, pohojnë nga Policie Kantonale në Solothurn, informon Albinfo.ch.

Në ndërtesë ka pasur më shumë se 20 persona, shumica prej tyre u nxorën jashtë banesave me ndihmën e zjarrfikësve. Për gjashtë persona, duke përfshirë këtu edhe fëmijë, ndihma erdhi shumë vonë, pasi ata vdiqën në vendngjarje. “Viktimat ende nuk janë identifikuar”, ka deklaruar Bruno Gribi, zëdhënës i policisë kantonale. Prandaj, nuk mund të jepen detaje të mëtejshme.

Sipas hetimeve fillestare, zjarri ka filluar në një nga katet më të ulëta dhe shkaktoi një tym të fortë, i cili është përhapur nëpër ndërtesë. Për momentin janë duke u ndërmarr të gjitha masat për t`u ndriçuar rasti.

VIDEO