Gjenerali iranian: Doja të vdisja në çastin kur raketa goditi avionin ukrainas

Vetëm pak ditë nga rrëzimi i avionit në Iran, ku mbetën të vrarë 176 persona, komandanti i Forcave Ajrore iraniane u shpreh se ai dha urdhër për ndërprerjen e të gjitha fluturimeve nga kompanitë derisa të qetësohej tensioni me SHBA-në, shkruan Alsat-m.tv

Por ky urdhër nuk është vënë në zbatim nga personeli i këtyre kompanive.

Në një konferencë për shtyp, gjenerali Amir-ali-Hajizadeh u shpreh se Irani e goditi avionin me raketë pasi i druheshin një sulmi nga SHBA-ja.

Operatori i mbrojtjes identifikoi avionin, por nuk arriti të lidhej me qendrën e aviacionit iranian për të konfirmuar nëse ai ishte apo jo i kompanive ajrore.

Hajizadeh shprehet se operatori që lëshoi raketën kishte vetëm 10 sekonda kohë për të menduar dhe në pamundësi të konfirmimit, ai vendosi ta godiste, një veprim ky sipas protokollit.

Por, gjenerali ndihet i penduar për këtë ngjarje dhe mori gjithë përgjegjësinë mbi vete.

“Pasi mora vesh që ky avion u godit nga raketat tona, nuk e doja më jetën”, shprehet Hajizadeh gjatë konferencës, përcjell Albinfo.ch.