Gjeneva nisi shpërndarjen e tabletave të jodit për një kategori banorësh

Tabletat e jodit besohet se mbrojnë gjëndrën tiroide nga rrezatimi

Që nga pushtimi i Ukrainës nga Rusia në shkurt, ka shqetësime në Zvicër për bombardimin e reaktorëve bërthamorë, duke lëshuar substanca radioaktive që mund të shkaktojnë kancer të tiroides, përcjell albinfo.ch.

Tabletat e jodit, që besohet se mbrojnë gjëndrën tiroide nga rrezatimi, u shpërndanë tashmë për të gjithë ata që jetonin në një rreze prej 50 km rreth termocentraleve zvicerane.

Për të tjerët, u takon kantoneve të sigurojnë që e gjithë popullata e tyre t’i marrë këto tableta brenda 12 orëve pas dhënies së një urdhri kombëtar.

Megjithëse Gjeneva ndodhet 70 km larg reaktorit më të afërt, zyrtarët kantonalë duan të ndërmarrin një “shpërndarje parandaluese për fëmijët, të rinjtë dhe gratë shtatzëna”, tha Laurent Paoliello, zëdhënës i Departamentit të Sigurisë, Popullsisë dhe Shëndetësisë.

Do të ruhej një stok për pjesën tjetër të popullsisë, e cila do të merrte jod në rast emergjence.

---