Gjermania lëshon viza pune deri në vitin 2020

“Unë mund të ju njoftoj se rregulla gjermane për hapjen e tregut të punës karshi vendeve të Ballkanit Perëndimor, së cilës ju iu referoheni, është fillimisht e afatizuar deri në vitin 2020”, thuhet shkurt në këtë përgjigje

Një numër i konsiderueshëm i qytetarëve të Kosovës vazhdojnë të ndjekin rrugën e emigrimit, qoftë në rrugë legale apo ilegale.

Gjermania vazhdon të jetë një ndër vendet më të kërkuara nga kosovarët, përcjell albinfo.ch.

Vetëm gjatë vitit 2016 nga Ambasada Gjermane ishin lëshuar pesë mijë viza të punës për kosovarët ndërsa për vitin 2017, kjo ambasadë ende nuk ka publikuar shifrat.

Në një përgjigje dhënë për “Indeksonline”, zëdhënësi i Ambasadës Gjermane, Marten Menger thotë se mundësia e punësimit në Gjermani për kosovarët është e afatizuar deri në vitin 2020.

“Unë mund të ju njoftoj se rregulla gjermane për hapjen e tregut të punës karshi vendeve të Ballkanit Perëndimor, së cilës ju iu referoheni, është fillimisht e afatizuar deri në vitin 2020”, thuhet shkurt në këtë përgjigje.

Gjithashtu sipas tij, hapja e tregut të punës është një rregull interne gjermane dhe nuk është siç është deklaruar gjerë e gjatë marrëveshje bilateral në mes Kosovës dhe Gjermanisë.

Mundësia e punësimit jashtë Kosovës ka ofruar mundësi të shkëlqyeshme për punëkërkuesit kosovarë sepse përpos përfitimeve financiare, ato kanë sjellë në Kosovë edhe shkathtësitë dhe përvojën evropiane duke kontribuar kështu në ekonomi dhe zhvillimin e tregut të punës në Kosovë.

Ndërkohë, Kosova vazhdon të jetë një vend i izoluar.