Gjuha shqipe nuk figuron në aeroportin e Shkupit

Një gjë e tillë iu ka rënë në sy së tepërmi edhe mërgimtarëve që kanë ardhur në pushime në Maqedoni

Në aeroportin e Shkupit “Aleksandri i Maqedonisë” nuk gjen asnjë orientim në gjuhën shqipe dhe e njëjta gjë ndodh edhe në faqen zyrtare të aeroportit. Të dyja gjuhët në të cilat mund të informohesh janë maqedonishtja dhe anglishtja. Fenomeni shqetësues ka ngjallur pakënaqësinë e shqiptarëve. Një gjë e tillë iu ka rënë në sy së tepërmi edhe mërgimtarëve që kanë ardhur në pushime.

Vajdin Gega nga Frëngova e Strugës, shqiptar që vinte nga Zvicra, tepër i indinjuar ka thënë për “Gazetën Shqiptare” se “është e padrejtë që mungon versioni shqip, kur do të informohesh me të dhëna rreth itinerarit dhe të dhëna të tjera për fluturimin”. Të njëjtin mendim me të ndan edhe Avdi Vinca nga Struga, i cili është emigrant në Vjenë.

“Kjo është skandaloze dhe nuk di kujt t’ia vësh fajin, turqve që e menaxhojnë aeroportin përkohësisht, apo autoriteteve maqedonase, kur dihet që mbi 60 % e udhëtarëve janë shqiptarët e Maqedonisë që punojnë në emigracion”, – është shprehur Vinca. Sipas tij, është emergjent një version në gjuhën shqipe për nevojat e shqiptarëve në udhëtim.

Në aeroportin e Shkupit mbizotërojnë edhe elemente të mbishkrimeve të përgjithshme dhe materialeve reklamuese në gjuhën maqedonase, duke u nisur nga mbishkrimi gjigant në hyrjen e portës së Aeroportit që mban emrin e Aleksandrit të Madh në alfabetin cirilik. Përkundër kësaj, gjuha shqipe nuk figuron në asnjë cep të aeroportit.