Huawei, në gjendje të vështirë

Kompania kineze Huawei ka paralajmëruar një dekadë të vështirë duke dhënë një paralajmërim të ashpër për të ardhmen e kompanisë.

Udhëheqësi i saj, Ren Zhengfei, i ka thënë stafit se “ftohja” do të ndihet nga të gjithë.

Kompania, sipas tij, duhet të fokusohet në fitimin mbi rrjedhën e parave dhe zgjerimin nëse dëshiron të mbijetojë në tre vjetët e ardhshme.

“Dekada e ardhshme do të jetë një periudhë historike shumë e dhimbshme, pasi ekonomia globale vazhdon të bjerë”, tha Zhengfei transmeton BBC, përcjell Albinfo.ch.

Ndikim në këtë kompani pati pandemia dhe bllokada nga SHBA-ja ndaj disa bizneseve kineze.

“Huawei duhet të zvogëlojë çdo pritje tepër optimiste për të ardhmen dhe deri në vitin 2023 apo edhe 2025, duhet ta bëjmë mbijetesën udhëzuesin më të rëndësishëm dhe jo vetëm të mbijetojmë, por të mbijetojmë me cilësi”, theksoi shefi i kompanisë.

Ekonomia kineze është nën presionin e faktorëve si kufizimet pandemike, kriza e industrisë së pronave dhe rënia e marrëdhënieve ndërkombëtare.

Huawei, i listuar në mënyrë rutinore si firma më e madhe e Kinës, po punon për të menaxhuar rënie të mëdha në të ardhura dhe fitime.

Në tre muajt e parë të vitit 2022, të ardhurat ranë 14 për qind dhe marzhi i fitimit neto u ngushtua në 4.3 për qind, nga 11.1 për qind një vit më parë./Albinfo.ch

 

---