I shtohet në 15 vjet burg dënimi “shëruesit nga Berna”

Në rigjykim është konstatuar se ka indikacione të mjaftueshme se i dënuari u ka dhënë me qëllim 16 “pacientëve” të tij gjak të infektuar me HIV

Dënimi i të ashtuquajturit “shëruesi nga Berna” pati bërë shumë bujë në mediet zvicerane. Atij para një viti i ishte shqiptuar nga Gjykata Regjionale e Bernës një dënim prej 12.9 vitesh burg duke u shpallur fajtor se i ka infektuar qëllimisht me HIV dhe hepatit c disa persona që i kishin besuar “trajtimit” të tij. Dënimi ishte dhënë për shkaktim të qëllimshëm të lëndimeve trupore dhe pe¨rhapje të sëmundjeve të rënda.

Pasi që “shëruesi” nuk kishte qenë i kënaqur me lartësinë e dënimit ai kishte bërë ankesë. Avokati i tij kishte kërkuar lirimin e klientit si të pafajshëm.

Si rezultat, Gjykata e lartë e Bernës ka marrë dje një vendim duke ia shtuar atij dënimin. Kështu, mjeku i vetëquajtur alternativ do të mbetet në burg për 15 vjet.

Në rigjykimin e bërë nga Gjykata e Lartë e Bernës, është konstatuar se ka indikacione të mjaftueshme se i dënuari u ka dhënë me qëllim 16 “pacientëve” të tij gjak të infektuar me HIV.