IES: BE të shpejtojë liberalizimin e vizave për kosovarët

Bashkimi Evropian duhet të nisë sa më parë dialogun zyrtar për liberalizimin e vizave me Kosovën dhe t’ia japë asaj udhërrëfyesin për këtë proces, vlerësojnë përfaqësues të Iniciativës Evropiane për Stabilitet. Në raportin e fundit të saj trajtohet izolimi i Kosovës në procesin e liberalizimit të vizave, ndërsa thuhet se me qasjen aktuale të Brukselit karshi Kosovës po dëmtohen interesat dhe angazhimi i BE-së për vendin.

Iniciative Evropiane për Stabilitet i ka bërë thirrje BE-së që të ndryshojë qasjen ndaj Kosovës lidhur me liberalizimin e vizave, njofton Radio Evropa e Lirë, të nisë sa më parë dialogun për viza dhe të përgatisë udhërrëfyesin zyrtar për këtë proces. Në raportin e fundit të kësaj organizate, vlerësohet se duke e lënë Kosovën jashtë liberalizimit të vizave, BE po i dëmton interesat dhe angazhimin e tij në Kosovë.