Incidente të reja në Maqedoni

Incidente të tjera janë shënuar mbrëmë në Shkup, por edhe një incident në Tetovë, ka raportuar Ministria e Punëve të Brendshme e Maqedonisë

Sipas policisë në incidentin e parë një grup prej katër personash kanë rrahur tre fëmijë mbrëmë rreth orës 19.00 në afërsi të Parkut të Qytetit në Shkup.  

Sipas informacioneve, sulmuesit kanë përdorur shufra hekuri ndaj të miturve. Dy nga fëmijët kanë marrë plagë të rënda, njëri prej të cilëve është shtruar në spitalin kirurgjik në Shkup.

Një incident tjetër ka ndodhur në lagjen Shutkë kur katër persona kanë sulmuar fizikisht vajzë shqiptare, 20 vjeçe. Ata pasi që e kanë rrahur fizikisht, kanë shtënë në ajër me armë zjarri, duke u larguar nga vendi i ngjarjes.

Incidenti i tretë sipas Ministrisë së Brendshme maqedonase, është regjistruar pas mesnate, kur policia ka bllokuar rrugën “Cvetan Dimov” në Çair, pasi disa të rinj  shqiptarë janë ndaluar me dyshimin se kanë sulmuar me gurë autobusin e linjës 57, raportojnë mediat në Maqedoni.

Nga ana tjetër raportohet nga portali shqiptar në Shkup ”Zhurnal” për djegien e urës së drunjtë që lidh vendbanimin Llokë me lagjen Nerez, në Shkup.

Sipas këtij portalit, lajmin e ka konfirmuar edhe zyrtarisht Ministria e Punëve të Brendshme.

Pas incidenteve të fundit në Maqedoni është bërë thirrje nga faktori vendës dhe ndërkombëtar për tejkalimin e situatës .

Incidentet e fundit paraqesin kërcënim serioz për bashkëjetesën dhe nëse organet e drejtësisë nuk i zbardhin sa më parë të njëjtat, atëherë incidentet mund të dalin nga kontrolli duke kërcënuar në masë të madhe edhe stabilitetin e vendit, ishte ky qëndrimi i përbashkët i të gjithë anëtarëve të Komitetit për Marrëdhënie Ndëretnike në Parlamentin republikan.