Interi ofron 9 milionë euro për Xhakën?

Deri më tash konsiderohej Lazio për të blerë Xhakën. Por, Interi i Milanos ka mundësi t`ia prishë planet Lazios dhe shefit të saj sportiv, Igli Tares

Granit Xhakës nuk po i ecën mirë në Borussia Mönchengladbach. Por, interesimi i klubeve të mëdha evropiane, sidomos atyre nga Italia për futbollistin shqiptar, nuk po pushon. Së fundi raportohet se Interi i Milanos ka treguar gatishmërinë për të pasur n¨radhët e veta kosovarin 20 vjeçar.

Sipas portalit “gerüchteticker.com”, krerët e Interit janë paraqitur në Mönchengladbach dhe kanë ofruar 9 milionë euro për mesfushorin e talentuar. Këto përçapje po bëhen me gjithë faktin se Xhakën e obligon kontrata me Borussia Mönchengladbach, e cila është e vlefshme deri në vitin 2017.

Deri më tash konsiderohej Lazio e Romës favorite për të blerë Xhakën. Shefi sportiv i Lazios, shqiptari Igli Tare ka një kohë që po bën përpjekje për ta sjellë në klubin e tij Xhakën, i cili duket se në verën që vjen do të braktisë Mönchengladbach-un. Por, Interi i Milanos ka mundësi t`ia prishë planet Lazios dhe Tares.