Ish polici akuzohet se ka vjedhur 500 mijë franga nga matësit e parkimit

Sipas aktakuzës, ish-polici dyshohet se kishte filluar të vidhte monedha nga automati i parkingut që në vitin 2003

Një ish zyrtar policie nga Basel-Landschaft dyshohet se ka vjedhur mbi 500,000 franga zvicerane nga matësat e parkimit.

Ai  akuzohet se ka vjedhur nga qyteti për më shumë se 20 vjet, duke përvetësuar gjithsej 538,557 franga zvicerane, transmeton albinfo.chj. Ndaj personit tani 68 vjeç, ishin ngritur procedura penale kur ai doli në pension në vitin 2021.

Sipas aktakuzës, ish-polici dyshohet se kishte filluar të vidhte monedha nga automati i parkingut që në vitin 2003. Si zyrtar policie i qytetit, i akuzuari kishte qasje në kutitë e monedhave ku ruheshin paratë e matësave të parkimit, shkruan Basler Zeitung.

Më tutje thuhet se ai i ka humbur në kazino paratë e vjedhura. Aktakuza nuk tregon nëse polici i pensionuar vuan nga varësia nga bixhozi.

Ai është arrestuar në shtator 2022 dhe akuzohet për përvetësim të rëndë dhe vjedhje komerciale. Gjykimi kundër 68-vjeçarit fillon në mars. Ai konsiderohet i pafajshëm derisa të provohet fajësia.

Ish-nëpunësi civil duhet të përgjigjet për të gjitha krimet që dyshohet se ka kryer pas vitit 2010. Kjo mbulon periudhën nga prilli 2010 deri në dhjetor 2021, përcjell albinfo.ch.

Sipas Basler Zeitung, banori i Bazelit akuzohet për vjedhjen e një totali prej 487,128 frangash zvicerane gjatë kësaj kohe. Vjedhjet e dyshuara para vitit 2010 tashmë janë parashkruar.

Një rast i ngjashëm ndodhi në vitin 2019 në Richterswil në kantonin e Cyrihut. Atje, një ish-nëpunës civil vodhi 144,000 franga zvicerane nga matësat e parkimit. Ai u dënua në vitin 2019 me një dënim me burgim me kusht prej dy vitesh. Ende nuk dihet se me çfarë dënimi do të përballet ish-nëpunësi civil i Bazelit. (nib)

---