Isufi nuk është kundërkandidat i Pacollit

Por, Isufi nuk përjashton mundësinë që nga AAK-ja, apo edhe nga vetë opozita, të ketë një kundërkandidat të Pacollit

　

Nënkryetari i AAK-së, Ahmet Isufi, ka mohuar sot të jetë kundërkandidat i mundshëm i Behgjet Pacollit për president.

　

Por, gjatë një intervistë për Evropën e Lirë, Isufi nuk përjashton mundësinë që nga AAK-ja, apo edhe nga vetë opozita, të ketë një kandidat që do të sfidonte kandidaturën e Pacollit.

　

“Nuk është e vërtetë, më shumë është spekulim. Ka të bëjë me interesim të mediave dhe qarqeve të caktuara, që unë nuk e di. Me mua nuk ka biseduar askush në këtë drejtim”, ka thënë Isufi.

　

Sipas tij, ditëve në vijim, do të ketë takime në AAK, ku do të marrin qëndrim rreth votimit për president të Kosovës. “Konsideroj se deri më tani është vetëm fillimi. Më vonë shohim se a kanë edhe partitë tjera ndonjë kandidat, i cili do të mund të sfidonte zotin Pacolli”, ka thënë nënkryetari i AAK-së.

　

Mediave elektronike në Kosovë raportuan dje se Isufi mund të jetë i propozuar tjetër për postin e presidentit.

　

Ndërkohë, kreu i AKR-së, Behgjet Pacolli aktualisht nuk mund të llogarisë në mbështetjen e të gjithë deputetëve të PDK-së për t’u bërë president shteti, edhe pse Këshilli Drejtues i partisë që drejtohet nga Hashim Thaçi, ditë më parë ka vendosur që Presidencën t’ia lërë Koalicionit për Kosovën e Re.

　

Sipas mediave të Kosovës, të cilat bazohen në burime partiake, janë tetë deputetët të PDK-së, që nuk do ta votojnë Pacollin për president. Dhe, pas votat e tyre, lideri i AKR-së do ta ketë vështirë të vihet në krye të shtetit. PDK-ja, sipas mediave, nuk ka vullnet që AKR-së t’ia japë më shumë se tri ministri, e aq më tepër për t’ia lënë në duar Ministrinë e Ekonomisë apo Ministrinë e Punëve të Jashtme.

　

　

　

---