Jagcilar: Rezultatet e regjistrimit nga Serbia – të pavlefshme

"Jemi në bisedime me Komisionin Evropian dhe me UNOPS-in për të bërë regjistrimin (në veri)"

Ministri i Administratës Publike, Mahir Yagcilar, ka kundërshtuar deklarimet e përfaqësuesve të Serbisë se shteti serb do të zhvillojë një proces të ri të regjistrimit në Kosovë. Synimin e Beogradit për të kryer regjistrimin në Kosovë, Yakcilar e ka quajtur të papranueshëm.

RTK citon ministrin Jagcilar të ketë thënë se “një proces i regjistrimit të popullsisë në Kosovë nga Serbia nuk është i pranueshëm.

Kjo është një çështje për të cilën mund të vendosim edhe me ministritë tjera dhe në qeveri, por për sa i përket procesit të një regjistrimi të tillë, unë mund të them se rezultatet e tij janë të pavlefshme”.

Më tutje, ministri i Administratës Publike ka shtuar se ministria që drejton ai është në bisedime me Komisionin Evropian dhe me UNOPS-in për të bërë regjistrimin (në veri të Kosovës) dhe rezultatet e këtij regjistrimi do të jenë të vlefshme për territorin e Kosovës në tërësi.