Ka mbytur mbi 30 dele, ujku mund të lejohet për t`u vrarë

Por, ende nuk është vendosur gjithçka. Për të dhënë lejen për vrasje të ujkut duhet njëherë të takohet Komisioni Ndërkantonal

Pasi që deri më tash ka mbytur mbi 30 dele brenda një muaji, një ujk në kantonin Valis mund të lejohet për tu vrarë. “Kuota” prej 30 delesh të mbytura është kufiri i fundit i tolerancës që e jep ligji në këtë kanton sa u përket kafshëve grabitçare të mbrojtura me ligj, siç është ujku.

Por, ende nuk është vendosur gjithçka. Për të dhënë lejen për vrasje të ujkut duhet njëherë të takohet Komisioni Ndërkantonal, ka thënë një përgjegjës i zyrës për gjueti dhe kafshë të egra në Valis. Nevojiten shumë dokumente, veçanërisht që kanë të bëjnë me mbrojtjen e grigjave të deleve në regjionet e prekura etj.

Ekzekutimi i ujkut lejohet në rast se 30 dele të mbytura brenda muajit kanë qenë të mbrojtura në regjionin e caktuar ose që janë vlerësuar si të pambrojtshme. As njëri dhe as rasti tjetër nuk përkon me rastin e ujkut të Valisit, reagon organizata që mbron ujqit “Wolf Schweiz”.

Por pronarët e deleve nga regjioni kundërshtojnë këtë qëndrim. Ujku ka mbytur brenda më pak se një muaji 30 dele dhe 2 dhi, thotë një përfaqësues i këtyre të fundit. Qentë rojtarë të deleve, nuk mund të shfrytëzohen për shkak se në regjionin ku janë kullosat ka shumë shtigje për turistët, ka thënë ai.

Ekzekutimi i fundit, i lejuar i një ujku në Valis është bërë në shtator të vitit të kaluar. Kjo kishte ndodhur pasi që ai në mes të 21 korrikut dhe 24 gushtit kishte mbytur 39 dele. Shoqatat ambientale patën drejtuar kritika atëbotë kundër kësaj vrasjeje.