Kaos në aeroportin Orly të Parisit pas prishjes së kullës së kontrollit

Keystone EPA/FELIPE TRUEBA

Anulimet e fluturimeve në aeroportin Paris-Orly pritet të vazhdojnë edhe të hënën, pas një prishjeje të papritur të sistemeve të kontrollit të trafikut ajror të dielën, që detyroi anulimin e rreth 130 fluturimeve, shkruan The Local, transmeton albinfo.ch.

Sipas një zëdhënësi të Aeroports de Paris, rreth 40 për qind e të gjitha nisjeve dhe mbërritjeve të parashikuara për të dielën janë anuluar. Autoriteti francez i aviacionit civil (DGAC) fajësoi një “dështim të radarit në kullën e kontrollit të Orly” për ndërprerjen e rëndë të operacioneve.

DGAC u ka kërkuar linjave ajrore të reduktojnë fluturimet e së hënës me 15 për qind. Linjat ajrore pritet të vendosin vetë cilat fluturime do të anulohen, duke u dhënë zakonisht përparësi fluturimeve të gjata.

Ndërsa aeroporti Charles de Gaulle në Paris vazhdon të funksionojë normalisht, kaosi në Orly ka prekur udhëtime drejt shumë destinacioneve në Francë, Evropë dhe Afrikën e Veriut, transmeton albinfo.ch.

“Fluturimi është anuluar. Për fat të mirë jam me nënën time,” tha Agnes Zilouri, një pasagjere 46-vjeçare që po përpiqej të gjente një alternativë për fluturimin e saj drejt Oujda, Marok, për të marrë pjesë në një funeral familjar.

Nga 130 fluturimet e anuluara të dielën, gjysma ishin nisje dhe gjysma mbërritje. Aeroporti Orly, i dyti më i ngarkuar në Francë, trajtoi vitin e kaluar rreth 33 milionë pasagjerë, gjysma e volumit të aeroportit Charles de Gaulle.

Pasagjerëve u rekomandohet të kontaktojnë linjat ajrore për informacion të përditësuar mbi fluturimet e tyre, transmeton albinfo.ch.