Kolektivi “Marshojmë, s’festojmë” para 8 marsit, organizon aksion simbolik në Prishtinë

Kolektivi “Marshojmë, s’festojmë” ka organizuar sot aksion simbolik në bulevardin “George W. Bush”, në Prishtinë.

Në pjesë të rrugës kanë shkruar “Rrugët janë tonat”, në mbështetje të viktimave të ngacmimeve seksuale që ndodhin nëpër rrugë, transmeton albinfo.ch.

Përmes një postimi në rrjetin social “Faebook”, nga ky kolektiv kanë shkruar se secila grua mbart me vete përvoja të ngacmimeve seksuale nëpër rrugët e qytetit, teksa u tha se është e zakonshme të dëgjosh nga vajzat që rrëfejnë se si ecin natën me nxitim, duke mbajtur çelësat e shtëpisë në dorë.

“Situata për gratë që banojnë në zonat rurale është akoma më sfiduese, ku mungesa e ndriçimit dhe trafikut urban bën që rreziku të jetë edhe më i lartë. Ngacmimi seksual në hapësirat publike është një nga shprehjet më të zakonshme të abuzimit ndaj grave, duke i penguar ato të punojnë, të shoqërohen, të shkollohen e të jetojnë të lira. Asnjë grua apo vajzë, pavarësisht se ku jeton, nuk duhet të ketë frikë të lëvizë lirshëm. Prandaj, sot ne dolëm në rrugë për të deklaruar se RRUGËT JANË TONAT. Edhe për të ecur, edhe për të protestuar.  Për 8 mars marshojmë edhe për të kërkuar hapësira publike të sigurta për gratë. Marshojmë për njëra – tjetrën”, thuhet në njoftim.