Komandanti i KFOR-it: Të shmangen veprimet e njëanshme

ZKM

Komandanti i KFOR-it, gjeneralmajor Ozkan Ulutash, të premten ka takuar kryeministrin Albin Kurti.

Ai ka thënë se autoritetet e Kosovës duhet të shmangin veprimet e njëanshme që përkeqësojnë tensionet, pas operacionit të policisë ndaj ndërtesave të Bankës Postare Kursimore të Serbisë në veri të vendit.

Ulutash ka vënë në dukje se “veprimet e njëanshme që mund të përkeqësojnë tensionet duhet të shmangen dhe se duhet të ruhet koordinimi i duhur mes të gjithë aktorëve përkatës”.

Ulutash, përsëriti përkushtimin e palëkundur nga i gjithë personeli i KFOR-it për të vazhduar zbatimin e mandatit “për mjedis të sigurt për të gjithë njerëzit që jetojnë në Kosovë dhe lirinë e lëvizjes në çdo kohë dhe në mënyrë të paanshme”.

Ulutash i ka thënë Kurtit se NATO-ja vazhdon ta mbështesë dialogun e Bashkimit Evropian si mënyra e vetme për të zgjidhur çështjet me Serbinë, “për të mirën e të gjitha komuniteteve”.

Ulutash kujtoi se KFOR-i është katërfishuar me trupa që pas tensioneve në veri vitin e kaluar.