Kosova me tetë sportistë në Olimpiadë

Flamurmbajtësja e Kosovë në “Rio 2016” do të jetë padyshim kampionia Majlinda Kelmendi, xhudistja, e cila kryeson dhe klasifikimin botëror për peshën 52 kg

Tetë sportistë do të përfaqësojnë Kosovën në Lojërat Olimpike “Rio 2016”. Në debutimin e saj në një Olimpiadë, shteti më i ri në Evropë lë prapa edhe Shqipërinë, e cila pavarësisht premtimeve të presidentëve të federatave të ndryshme nuk do të shkojë më shumë se me pesë sportistë, shkruan albinfo.ch.

“Është historike për ne. Kosova në këtë Olimpiadë të parë merr pjesë me tetë sportistë. Dy prej tyre janë të kualifikuar, ndërsa gjashtë të tjerët janë me ftesa”, shprehet Besim Hasani, kryetar i Komitetit Olimpik të Kosovës.

Hasani pohon se pavarësisht mundësive dhe kohës së shkurtër në dispozicion, institucioni që ai drejton ka bërë gjithçka që sportistët të zhvillojnë një fazë përgatitore të mirë brenda dhe jashtë vendit. Sipas tij pritshmëritë më të mëdha për medalje, janë sigurisht te sporti i xhudos.

“Majlinda është kandidate serioze për medalje të artë olimpike, ndërsa kemi pritshmëri edhe nga Nora Gjakova. Por si do të jetë vetëm pjesëmarrja e Kosovës në një ngjarje të tillë me simbolet e saj në një event që ndiqet nga miliarda shikues, është një arritje e jashtëzakonshme”, thotë Hasani.

Flamurmbajtësja e Kosovë në “Rio 2016” do të jetë padyshim kampionia Majlinda Kelmendi, xhudistja, e cila kryeson dhe klasifikimin botëror për peshën 52 kg.

Nga tetë sportistët që do të marrin pjesë në Lojërat Olpimpike, vetëm dy janë me normë olimpike, Majlinda Kelmendi e Nora Gjakova që përfaqësojnë Kosovën në xhudo. Kurse me ftesë janë këta sportistë: Musa Hajdari e Vijona Kryeziu (atletikë), Lum Zhavelli e Rita Zeqiri (not), Qendrim Guri (çiklizëm), dhe Urata Rama (shenjëtari).