Kosova pret rezultat pozitiv kundër Ukrainës

Pas humbjes 6:0 nga Kroacia, në kampin kosovar është rikthyer optimizmi se mund të arrijnë rezultat ndaj Ukrainës

Përzgjedhësi i Përfaqësueses së Kosovës, Albert Bunjaki ka thënë se do të bëjë disa ndryshime për ndeshjen ndaj Ukrainës, që zhvillohet sot nga ora 18:00, shkruan albinfo.ch.

“Vijmë pas një ndeshje të vështirë të cilën e humbëm. E dimë që Ukraina është një skuadër e fortë. Rezultati nuk është pasqyrë e lojës me Kroacinë, pasi edhe ne patëm rastet tona. Sidoqoftë do të mundohemi të përmirësohemi, do të shohim aty ka nevojë të bëjmë ndërrimet e duhura”, deklaroi Bunjaki në konferencën për media.

Ai ka shtuar se pret një rezultat pozitiv. “Pas një rezultati të mirë me Finlandën pas një muaji u takuam me një ekip të fortë, ndoshta në 20 më të mirët siç është Kroacia dhe është e dukshme që kemi nevojë për përmirësime. Unë pres që në Kampionatin Evropian 2020 të jemi befasia e kampionatit. Kemi nevojë për përvojë dhe ky grup do të arrijë këtë”, theksoi përzgjedhësi i Kosovës.

Në konferencë ishte edhe sulmuesi Albert Bunjaku. Ai ka shtuar se nuk duhet të bëjnë gabimet, si ndaj Kroacisë. “Bashkë me përzgjedhësin kemi analizuar gabimet në mënyrë që t’i përmirësojmë”, shprehet sulmuesi i rrezikshëm.

“Do të mundohemi të ruajmë rezultatin baras dhe të sulmojmë me kundërsulme që eventualisht të shënojmë për një rezultat të favorshëm”, ka theksuar Bunjaku.