Lajme

Kosovarët me qasje në 3G

IPKO nga disa e sotme ka lëshuar në funksion rrjetin 3G, i cili do të ofrojë shpejtësi më të madhe të internetit deri 100 herë më të shpejt se deri më tani

E diel, 1 Dhjetor 2013 - 11:18 albinfo.ch

Nga dita e sotme, operatori i dytë i telefonisë mobile në Kosovë, IPKO ka lëshuar në funksion rrjetin 3G, i cili do të ofrojë shpejtësi më të madhe të internetit deri 100 herë më të shpejt. Në rrjetin 3G, sipas përfaqësuesve të IPKO-s, do të kenë qasje rreth 40 për qind e përdoruesve të internetit celularë.

Drejtori i Përgjithshëm i IPKO-s, Robert Erzin, ka thënë se 40 për qind e konsumatorëve që përdorin internetin në telefonat e tyre mobil, nga e diela më 1 dhjetor do të kenë qasje në rrjetin 3G.

Erzin ka paralajmëruar se do të mundohen që sa më shpejt të kaloj në rrjetin 4G, raporton “Zëri”.

“Përdoruesit tan do të kenë internetin shumë më të shpejtë në mobil dhe do të kalojnë automatikisht në rrjetin 3G. Ne kushte ideale 3G do të ofroj shpejtësi deri ne 100 herë më të madhe se rrjeti 2G”, theksoi Erzin.

“Prej nesër, kjo bazë e konsumatorëve do të mund ta përdorin 3G sepse ne do ta ofrojmë atë për të gjithë dhe ata nuk do të kenë nevojë të aktivizojnë asgjë, vetëm do të kalojnë në rrjetin 3G”, ka thënë Erzin.

Ata kanë paralajmëruar se shumë shpejt do të kaloj në 4G, por sipas Erzin aktualisht nuk ka telefona të mjaftueshëm të cilët do ta përdornin rrjetin 4G.

“Prej të dielës përdoruesit tanë, të telefonisë mobile, do të kenë internetin shumë më të shpejt në telefonat e tyre mobil, do të mund ta kenë edhe zyrën e tyre me veti, gjithçka do të jetë më shpejtë sa i përket shpejtësisë së internetit në pajisjet e tyre mobile”, është shprehur Erzin.

E vetmja gjë që duhet bërë është konfigurimi për të shfrytëzuar njërën prej pakove Mini, Midi, Maxi të ofruara nga IPKO për konsumatorë, që kanë çmimin prej 1.95 euro deri në 4.95 euro. 3G pako do të sjellë prej 1 megabit për sekondë shpejtësi deri në 5 megabit për sekondë, varësisht prej pakos.

3G është shkurtesa për brezin e tretë të teknologjisë së telekomunikacionit celularë. 3G gjen aplikim në celularë, qasje në internet, në telefon, qasje fikse në internet, video thirrje dhe TV celularë. Deri sa IPKO ka ecur me 3G, operatori Vala ka premtuar se shumë shpejt do të plasojë 3G.